२०१९साली बंद पडलेले बोर लागले वहायला /गावात झाले चिंताजनक वातावरण!
बीड/प्रतिनिधी
वडवणी तालुक्यातील चिंचवण येथे एक अनोखी व चिंताजनक घटना समोर आली आहे. किसन दोडताले या शेतकऱ्यांच्या शेतातील २०१९ साली बंद पडलेला बोरवेल अचानकपणे प्रचंड वेगाने वाहू लागली आहे.या अनपेक्षित घटनेमुळे संपूर्ण शेतात पाण्याचा पूर आल्यासारखे चित्र निर्माण झाले असून, कपाशीच्या पिकाचे मोठ्या प्रमाणावर नुकसान झाले आहे. शेतात सगळीकडे पाणीच पाणी असल्याने शेतकऱ्यांचे आर्थिक नुकसान झाले आहे.गावात या घटनेमुळे भीतीचे वातावरण निर्माण झाले आहे. बोर विहीर इतक्या वर्षांनी अचानक कशी वाहू लागली, याबाबत ग्रामस्थांमध्ये चर्चेला उधाण आले आहे. काहींनी यामागे नैसर्गिक कारणे असावीत असे सांगितले, तर काहींनी ही भूगर्भातील हालचाल असल्याची भीती व्यक्त केली आहे.
