श्री तुळजाभवानी मातेची मंचकी निद्रा प्रारंभ !
जनक्रांती न्युज/रामराजे जगताप
धाराशिव जिल्हा प्रतिनिधी:- जिल्ह्यातील तुळजापूर नगरीत शारदीय नवरात्रोत्सवाची चाहूल लागली आहे. कुलस्वामिनी श्री तुळजाभवानी मातेची मंचकी निद्रा रविवारी सायंकाळपासून विधीवत सुरू झाली आहे. देवीच्या या पवित्र निद्रा काळात भाविकांच्या मनात भक्तिभाव आणि उत्सुकतेची लहर उमटलेली दिसत आहे. दि. २२ सप्टेंबर रोजी पहाटे मंचकी निद्रेचा समारोप होईल. त्याच दिवशी दुपारी घटस्थापनेसोबत शारदीय नवरात्रोत्सवाला सुरुवात होईल. या काळात लाखो भाविक या अद्वितीय सोहळ्याचे साक्षीदार होण्यासाठी तुळजापूरला दाखल होतात. श्री तुळजाभवानी माता ही एकमेव चलमूर्ती असल्यामुळे या परंपरेला विशेष महत्त्व आहे. वर्षातून तीनदा होणारी मंचकी निद्रा ही भक्तांना अध्यात्मिक ऊर्जा देणारी परंपरा मानली जाते.
