बाळराजे आवारे पाटील यांचे आंदोलन मागे घेण्यासाठी अप्पर पोलीस अधीक्षक चेतना तिडके, तहसीलदार यांना जमले नाही !
केज/प्रतिनिधी
बीड जिल्ह्यातील केज शहरात सोमवारी सकाळी कोरडेवाडी साठवण तलाव मंजूर करण्याच्या मागणीसाठी सुरू झालेल्या शांततामय आंदोलनाला दुपारपर्यंत हिंसक वळण मिळाले. छत्रपती शिवाजी महाराज चौकात सुरू असलेल्या रस्ता रोकोदरम्यान काही आंदोलक अचानक आक्रमक झाले आणि महामंडळाच्या बसगाड्यांवर दगडफेक केली. काही गाड्यांचे नुकसान झाले असून, काही प्रवासी जखमी झाले आहेत.अहिल्यानगर–अहमदपूर राष्ट्रीय महामार्गावर सकाळपासूनच कोरडेवाडी साठवण तलावाच्या मंजुरीसाठी शेकडो नागरिकांनी ठिय्या मांडला होता. गेल्या तीन तासांहून अधिक काळ हे आंदोलन सुरू होते. रस्ता पूर्णपणे बंद झाल्याने दोन्ही बाजूंना वाहनांच्या लांबच लांब रांगा लागल्या होत्या. पोलिसांनी आंदोलकांशी संवाद साधून आंदोलन संपवण्याचे वारंवार प्रयत्न केले. मात्र, शासनाकडून मागणी मान्य होणार नाही, हे लक्षात येताच आंदोलक अधिक आक्रमक झाले.दगडफेकीत बसमधील प्रवासी जखमी तणाव वाढत असतानाच काही तरुणांनी हातातील दगड उचलून एसटी महामंडळाच्या बसगाड्यांवर दगडफेक केली. काही बसांच्या काचा फुटल्या, वाहनांचे नुकसान झाले. अचानक झालेल्या हल्ल्यामुळे प्रवाशांमध्ये भीतीचे वातावरण निर्माण झाले. काही प्रवासी दगड लागून जखमी झाले असून त्यांना तातडीने जवळील रुग्णालयात दाखल करण्यात आले आहे.पोलिसांकडून लाठीचार्ज, काहींना घेतले ताब्यात परिस्थिती नियंत्रणाबाहेर जात असल्याचे लक्षात येताच पोलिसांनी हस्तक्षेप केला. आंदोलकांना ताब्यात घेण्याची कारवाई सुरू करण्यात आली. दगडफेक थांबवण्यासाठी पोलिसांनी सौम्य लाठीचार्ज करत जमावाला पांगवले. काही आंदोलकांनी घटनास्थळावरून पळ काढला असून काहींना पोलिसांनी ताब्यात घेतले आहे.दरम्यान, कोरडेवाडीत एका तरुणीचे याच मागणीसाठी आमरण उपोषण सुरू आहे. अनेक दिवसांपासून सुरू असलेल्या उपोषणाची प्रशासन दखल घेत नसल्याने शेतकरी अधिक संतप्त झाले होते. संतप्त शेतकऱ्यांनी रस्त्यावर उतरून सरकारविरोधात जोरदार घोषणाबाजी केली.
