कळंबचे ग्रामदैवत अंबाबाई देवी मंदिरात नवरात्र उत्सवाची जय्यत तयारी !
जनक्रांती न्युज/रामराजे जगताप
धाराशिव जिल्हा प्रतिनिधी – पुरातन अंबाबाई देवी मंदिर हे कळंबचे ग्रामदैवत म्हणून पंचक्रोशीत प्रसिद्ध आहे. देवीच्या मंदिरात नवरात्रोत्सवाची जय्यत तयारी सुरू आहे. मंदिर परिसराची साफसफाई करण्यात आली; मंदिरासह परिसरात आकर्षक विद्युत रोषणाई करण्यात आली असून, नवरात्रोत्सवात आरती, जोगवा, भारुडे, प्रवचन, धार्मिक कार्यक्रमांची रेलचेल असणार आहे. तसेच देवीच्या दर्शनासाठी शहरासह पंचक्रोशीतून येणाऱ्या भाविकांची संख्या मोठी आहे. नवसाला पावणाऱ्या अंबाबाई देवीच्या नवरात्रोत्सवाची तयारी सुरू आहे. शहराच्या मध्यवस्तीत असलेल्या अंबाबाई मंदिरात मोठ्या उत्साहात घटस्थापना केली जाते. यंदाचे नवरात्र दहा दिवसांचे असून, मंदिरासह घरोघरी घटस्थापनेची तयारी सुरू आहे. दर मंगळवार, शुक्रवारसह नवरात्र उत्सवात प्रत्येक दिवशी भाविकांची दर्शनासाठी मोठी गर्दी होते.पुरातन अंबाबाईचे मंदिर कळंबकरांचे ग्रामदैवत असल्याने मंदिरात दिवसभर दर्शनासाठी भाविकांची रीघ असते. मंदिरात दररोज सायंकाळी होणाऱ्या आरतीला भाविक मोठ्या संख्येने उपस्थित असतात. शासकीय नोकरी किंवा व्यापारानिमित्त बाहेरगावी राहणारे कळंबकरही दरवर्षी नवस फेडण्यासाठी नित्यनेमाने अंबाबाईच्या मंदिरात येतात वंशपरंपरागत पुजारी राहुल जगन्नाथ मुळे पाडवा, नवरात्र महोत्सव, दीपावली, स्वातंत्र्य दिन व शिवजयंतीसह अनेक धार्मिक कार्यक्रमांचे मंदिरात आयोजन करतात. मंदिरात विविध उत्सव साजरे केले जातात. पूजा-अर्चा, मंदिराच्या देखभालीचे काम चार पिढ्यांपासून वंशपरंपरागत पुजारी असलेला मुळे परिवार करीत आहे. अंबाबाई देवी मंदिर हे जागरूक देवस्थान म्हणून पंचक्रोशीत प्रसिद्ध आहे.
